Framtíð kornræktar á Íslandi

Mikilvægi innlendrar kornræktar hefur aukist verulega undanfarin ár. Stjórnvöld hafa lofað að skoða leiðir til að efla innlenda matvælaframleiðslu til að tryggja fæðuöryggi landsins sem verður brothættara með hverju árinu - hvort sem það er stríðsrekstri, smitsjúkdómafaröldrum eða hamfarahlýnun að kenna. Tilraunastjóri Landbúnaðarháskóla Íslands segir í Þetta helst að íslenska landbúnaðarkerfið sé svo brotið þegar kemur að kornrækt, að það sé í rauninni hvorki hægt að selja íslenskt korn að ráði, né kaupa það. Það er enginn markaður með korn því það ræktar enginn korn, og það ræktar enginn korn því það er enginn markaður með korn. Eins konar pattstaða sem er ómögulegt að vinna sig út úr. En þessu stendur til að breyta, mögulega með stofnun kornsamlags eins og þekkist í Skandinavíu. Þetta helst skoðaði hvaða möguleika við höfum þegar kemur að kornrækt á Íslandi og ræddi við Hrannar Smára Hilmarsson, plöntuerfðafræðing og tilraunastjóra LBHÍ.